Фестивали вилоятии “Оши палав - 2016”

Рейтинги истифодабарандагон: / 0
БадтаринБеҳтарин 

altСанаи 5 октябри соли ҷорӣ, дар Маҷмааи фарҳангию таърихии “Қалъаи Хуҷанд”-и маркази вилояти Суғд бо мақсади ташвиқу тарғиби фарҳанги рӯзгордорӣ, эҳё ва рушди анъана ва суннатҳои мардумӣ ва дар доираи чорабиниҳо бахшида ба 25-солагии Истиқлолияти давлатии Ҷумҳурии Тоҷикистон Фестивали “Оши палав” баргузор шуд.

Раиси вилояти Суғд Абдураҳмон Қодирӣ бо ҳамроҳии иштирокчиёни Машварати омӯзишии адибони ҷумҳурӣ ба Маҷмааи фарҳангию таърихии “Қалъаи Хуҷанд” омад ва бо ҷараёни омодасозии Оши палави иштирокчиёни ҷашнвора шинос гардид.

Ҷоиз ба таъкид аст, ки дар фестивали мазкур меҳмонон аз минтақаҳои гуногуни Тоҷикистон, аз ҷумла аз шаҳри Душанбе, намояндагони корпусҳои дипломатӣ, ташкилотҳои байналмилалӣ, шахсиятҳои шинохта, олимону зиёиён, хабарнигорони расонаҳо, иштирокчиёни Машварати омӯзишии адибони ҷумҳурӣ ва теъдоди зиёди сокинон иштирок намуданд.

Дар ин рӯз дар Маҷмаа дастурхони идона ороста шуд ва беш аз 4000 нафар сокинон ва иштирокдорони зиёди фестивал ба таври ройгон аз Оши палави омодакардаи ошпазҳои моҳири шаҳру ноҳияҳои вилоят тановул намуданд. Оши палов ё худ палав - таоми миллии тоҷикон ба ҳисоб рафта, он аз қадимулайём хӯроки дӯстдоштаи мардуми тоҷик мебошад. Имрўз дар минтақаҳои гуногуни вилояти Суғд, аз ҷумла шаҳри Хуҷанд чанд намуди паловпазӣ маълум аст.

Барои иштирокчиён – ошпазҳои беҳтарин диплому мукофотпулиҳо тақдим шуд. Ба иштирокчиёни беҳтарини Фестивали “Оши палав” аз рӯи бахшҳои “Оши палави беҳтарин” - 5000 сомонӣ (ғолиби бахш Хайём Бобомуродов аз Панҷакент), “Ошпази касбии беҳтарин” – 3 000 сомонӣ (ғолиби бахш Раҳимов Мирзобарот аз Хуҷанд), “Ошпази беҳтарин байни муйсафедон” – 1000 сомонӣ (ғолиби бахш Холиқов Зикриё аз Исфара), “Ошпази беҳтарин байни занҳои калонсол” – 1000 сомонӣ (ғолиби бахш Санавбар Зоҳидова аз ноҳияи Ҷаббор Расулов), “Ошпази беҳтарин байни мардон” – 1000 сомонӣ (ғолиби бахш Аюб Бурҳонов аз ноҳияи Деваштич), “Ошпази беҳтарин байни занон” – 1000 сомонӣ (ғолиби бахш Кифоят Азимбоева аз Зафаробод), “Ошпази беҳтарин байни домодҳо” – 1000 сомонӣ (ғолиби бахш Дилшод Дадобоев аз Куҳистони Мастчоҳ), “Ошпази беҳтарин байни арӯсон” – 1000 сомонӣ (ғолиби бахш Зарина Сатторова аз ноҳияи Спитамен), “Ошпази беҳтарин байни ҷавонписарон” – 1000 сомонӣ (ғолиби бахш Қаюм Исмонов аз Конибодом), “Ошпази беҳтарин байни ҷавондухтарон” – 1000 сомонӣ (ғолиби бахш Дилноза Султонова аз шаҳри Гулистон), “Ошхури беҳтарин” – 2 000 сомонӣ (ғолиби бахш Рустам Худойназаров аз ноҳияи Бобоҷон Ғафуров), “Табақи калонтарин ва зеботарини миллӣ” – 1000 сомонӣ (ғолиби бахш шаҳри Истаравшан), “Саҳнача, намоиши фарҳангии беҳтарин” – 1000 сомонӣ (ғолиби бахш шаҳри Истиқлол), “Дастони моҳир” – 1000 сомонӣ (ғолиби бахш Сатторов Мелибой аз ноҳияи Ашт) диплому мукофотпулиҳо супорида шуд.

Хотирнишон бояд кард, ки ин барои дуввумин бор аст, ки дар вилояти Суғд Фестивали “Оши палав” доир мегардад. Қабл аз ин дар соли 2015 низ чунин фестивал баргузор шуда буд ва дар он беҳтарин ошпазҳои шаҳру ноҳияҳои вилоят иштирок доштанд.